Бүсгүйчүүддээ зориулан Сонгодог Гала концертыг толилууллаа

08.03.2019


АПУ Группийн хамт олны 40 гаруй хувийг бүсгүйчүүд эзэлдэг бөгөөд жил бүрийн 3 сарын 8-ны өдөр буюу ОУ-ын эмэгтэйчүүдийн эрхийг хамгаалах өдрийг тохиолдуулан нийт бүсгүйчүүдээ баярлуулдаг уламжлалтай юм. Өнгөрсөн жил “Улсын Драмын Эрдмийн театр”-т нэрт зохиолч Э.Оюуны зохиолоос сэдэвлэсэн “Би эндээс явахгүй” жүжгийг өргөн барьж байсан бол энэ жил “Дуурь Бүжгийн Эрдмийн Театр” болон “Соёлын Төв Өргөө”-ний хамт олонтой хамтран “Сонгодог Урлагийн Гала концерт” -ыг бүсгүйчүүддээ зориулан толилууллаа.

Бүсгүйчүүдийн нижигнэсэн алга ташилтад дор Гүйцэтгэх захирал Ц.Эрдэнэбилэг эмэгтэйчүүддээ мэндчилгээ дэвшүүлснээр арга хэмжээ албан ёсоор эхлэж, дэлхийн сонгодог балет Дон Кихот, Хунт нуур бүжиж Севилийн үсчин, Кармен, Богема дуурийн гоцлолуудаар сонор мялаасан гайхалтай уран бүтээлүүд Соёлын Төв Өргөөний тайзнаа амилж, урлагийн охь болсон үзэгдэл дуулал эгшиглэж байв. 


Тоглолт ид дунд өрнөж Монгол сонгодогуудаар үргэлжилсэн. Уран хас балет үзэгчдийг шагшуулж, Ээждээ, Бүүвэй Ээж, Ээжийнхээ ачийг яалаа даа, Аав ээж хоёр минь дуунууд бүсгүйчүүдийн сэтгэлийн утсыг хөндөж зарим нэг нь нулимсаа арчиж буй харагдсан. Тоглолтын төгсгөлд Монголын тал нутаг хэмээх бахархал болсон дууг Улсын Дуурь Бүжгийн Эрдмийн Театрын гоцлол дуучид, найрал дуучид, симфони найрал хөгжмийн хамтаар дуулж ёстой л нэг урлагийн дээж болсон тоглолтод сэтгэл нь ханасан үзэгч бүсгүйчүүд алга ташсаар өндөрлөсөн билээ. Ажилчдаа нэг өдөр ч болов ажил, гэр бүлийн орчноос түр холдуулж урлагаар дамжуулан гоо зүй, амьдралын бас нэгээхэн гайхалтай цаг хугацаагаа хамтдаа өнгөрүүлэх боломжийг олгодгоороо энэхүү арга хэмжээ онцлогтой юм. Бидний урилгыг хүлээн авч хүрэлцэн ирсэн нийт бүсгүйчүүддээ амьдралд нь аз жаргал, энэ хорвоогийн хамгийн сайн сайхан бүхнийг хүсэн ерөөе!